About

பிறந்தது 2-9-1956ல், திண்டுக்கல் மாவட்டத்தில். தாய்மொழி தமிழ் என்றாலும் தந்தை ஆந்திர மாநிலத்தில் வேலை பார்த்து வந்ததால் பள்ளி மற்றும் கல்லூரிப் படிப்பு முழுவதும் தெலுங்கில். 1976ல் தனது திருமணத்திற்குப் பிறகே தமிழைப் படிக்கவும் எழுதவும் கற்றார்.

தஞ்சை மெலட்டுர் கிராமத்தில் ஐந்து வருடம் வசித்ததில் மாவட்ட நூலகத்தில் தமிழ்ச் சிறுகதைகள், நாவல்கள் படித்து தனது இலக்கிய தாகத்தை வளர்துக் கொண்டார். தமிழில் முதலில் 1995ல் குங்குமச் சிமிழில் வெளிவந்த மொழிபெயர்ப்புச் சிறுகதை திரு எண்டமூரி வீரேந்திரநாத் அவர்களின் பந்தயம்.

தொடர்ந்து அந்தர்முகம் என்ற தெலுங்கு நாவலை இவர் மொழிபெயர்க்க அல்லயன்ஸ் நிறுவனத்தார் புத்தகமாக வெளியிட்டார்கள். இந்த நாவலை தெலுங்கில் எழுதியவர் திரு எண்டமூரி வீரேந்திரநாத்.

தெலுங்கு இலக்கிய உலகில் நாவல் ராணி என்று அழைக்கப்படும் திருமதி யத்தனபூடி சுலோசனா ராணி அவர்கள் எழுதிய ஜீவன தரங்காலு என்ற நாவல் இவரால் மொழியாக்கம் செய்யப்பட்டு சங்கமம் என்ற தலைப்பில் தமிழில் 1997ல் வெளியானது. சற்று பெரிய நாவல். இரு பகுதிகள் கொண்டது.

திருமதி டி. காமேஸ்வரி அவர்கள் எழுதிய இருநாவல்களையும், சிறுகதைத் தொகுப்பு ஒன்றையும் மொழி மாற்றம் செய்து தமிழ் வாசகர்களுக்கு தந்துள்ளார்.

இது வரையில் அறுபதுக்கும் மேற்பட்ட புதினங்கள் வெளியாகி உள்ளன. நான்கு சுய முன்னேற்ற நூல்கள் அதில் அடக்கம்.

பிரபல தமிழ் எழுத்தாளர்கள் திரு டி.ஜெயகாந்தன், திருமதி வாஸந்தி மற்றும் திரு ஷராஜ் அவர்கள் எழுதிய சிறுகதைகளை இவர் தெலுங்கில் மொழிபெயர்த்து, அவை விபுலா என்ற தெலுங்கு மாத இதழில் வெளியாகியுள்ளன. சொந்தமாகவும் சில சிறுகதைகளை எழுதியிருக்கிறார்.